Антикорупциска отвара предмет против Коста Петров, дознава „Локално“ од свои извори.
Се работи за дадени средства за издавачкиот центар ТРИ ДООЕЛ за проект наменет за едукација за кој вкупниот буџет изнесува 7.249.159 денари, сопствено кофинасисрање е 2.174.747 и ФИТР кофинансирање – 5.936.000 денари.
Конфликтот на интереси е во фактот дека тие ги издаваат неговите книги.
Петров во изјава за „Локално“ вели дека не е запознаен дека против него се подготвува случај и тврди дека не склучил договор за доделување на финансиски средства со таа издавачката куќа.
-Не сум запознаен дека од страна на Државната Комисија за спречување корупција е отворен предмет за било какво мое постапување.Понатаму, во врска со Вашите наводи, би сакал да Ве информирам дека во време на вршење на мојата функција како Директор на Фондот за иновации и технолошки развој не сум донел Одлука за финансирање на проект ниту сум склучил договор за доделување на финансиски средства со издавачката куќа ТРИ, вели Петров за „Локално“.
Тој појаснува дека носењето на одлука за доделување на финансиски средства за финансирање на проекти, воопшто не биле во надлежност на неговата директорска позиција.
-Имено, согласно Законот за иновациска дејност, доделувањето на финансиски средства за финансирање на проекти е во надлежност на Комитетот за одобрување на инвестиции.Комитетот за одобрување на инвестиции се состои од пет члена кои ги избира Владата, од редот на реномирани меѓународни експерти. Комитетот ги разгледува и одобрува предлог-проектите доставени до нив, по што донесуваодлука за финансирање на доставените проекти, истакнува тој.
Додаде дека сето наведено може да се верификува со проверка на целокупната документација која е достапна во Фондот за иновации и технолошки развој.
Појасни и дека останува отворен за соработка со надлежните институции.
До објавувањето на текстот, од ДКСК не добивме одговор за тоа дали против поранешниот директор на Фондот за иновации е отворен предмет.
Книжарница ТРИ има добиено средства и во 2018 година за проектот за електронска платформа за книги: Сопствено кофинасисрање 3.367.881,45 денари, ФИТР кофинансирање 6.119.108,55 денари, вкупен буџет 9.486.990,00 денари, во време кога на чело на Фондот бил Јован Деспотовски.
Б.М.