Тренерот на Барселона, Чави Ернандез, му соопштил на еден од најискусните играчи на каталонскиот клуб, Жерар Пике, дека следната сезона нема да има сигурно место во стартниот состав, пренесуваат шпанските медиуми.
Шпанскиот „Ас“ тврди дека се шпекулира дека Пике добил инструкции од клубот да се согласи на намалување на платата поради тешката финансиска состојба во клубот. Сепак, Пике ја одбил понудата на челниците, а шпанските медиуми наведуваат дека улогата на резерва треба да биде „казна“ за искусниот фудбалер.
На фудбалерот на Барселона му било понудено и олеснување при изборот на нов клуб, односно дека тимот од „Ноу Камп“ нема да му прави проблеми со обештетувањето.
Шпанските медиуми тврдат дека раководството на Барселона не е задоволно од деловните потфати на Пике, особено откако во јавноста се појави информацијата дека склучил договор за огромна провизија за да договори играње на шпанскиот Суперкуп во Саудиска Арабија.
Пред една година Пике се согласи на значително намалување на платата поради тешката финансиска ситуација во која се наоѓа Барселона.
Пике (35) порасна во Барселона, а потоа од 2004 до 2008 година настапуваше за Манчестер Јунајтед, а една сезона помина на позајмица во Сарагоса. За Барселона одигра 606 натпревари и постигна 52 гола.