По 40 години вооружени судири против Турција, лидерот на Курдистанската работничка партија (ПКК) од турски затвор ги повика своите симпатизери, поддржувачи и борци за независен Курдистан да го положат оружјето.
Во изјава што ја прочитаа пратениците на прокурдската Партија за слобода и демократија на народот (ДЕМ) во четвртокот во Истанбул, затворениот водач на ПКК рече дека групата „ја завршила својата работа и дека е време да се распушти“.
„Во текот на историјата што се протега над 1.000 години, Турците и Курдите отсекогаш сметале дека е неопходно да останат во сојуз, со доминантно доброволен аспект, со цел да се задржат и да преживеат против хегемонистичките сили“, напиша Оџалан
Во климата создадена од повикот на (лидерот на Партијата за националистичко движење) Девлет Бахчели, волјата што ја покажа претседателот (Реџеп Таип Ердоган) и позитивните пристапи на другите политички партии, повикувам на положување на оружјето и преземање на историска одговорност за овој повик – заклучи тој.
Повикот потенцијално може да стави крај на конфликтот кој трае повеќе од четири децении и однесе десетици илјади животи. Оџалан (75) е затворен на островот Имрали во близина на Истанбул од 1999 година, откако беше осуден за предавство.