Оваа година не беше како ниедна друга за цените на нафтата.
Светските цени ја завршуваат годината на околу 51 долари за барел, близу просекот за 2015-2017 година, но ова е само маска за нестабилната година, пишува Ројтерс.
Во април, суровата нафта во САД потона длабоко во негативна територија, а сортата Брент падна под 20 долари за барел, погодена од пандемијата КОВИД-19 и ценовната војна меѓу нафтените гиганти Саудиска Арабија и Русија.
Остатокот од 2020 година помина во опоравување од овој пад, бидејќи пандемијата влијаеше на побарувачката на гориво ширум светот. Додека краткотрајниот пад на фјучерсите на нафтата во САД на негативни нивоа од -40 долари за барел напролет нема да се повтори во 2021 година, новите блокади и постепеното лансирање на вакцини за лекување на вирусот ќе ја ограничат побарувачката следната година, а можеби и потоа.
„Навистина не сме виделе вакво нешто – ниту во финансиската криза, ниту по 11.09, рече Питер МекНали од истражувачката компанија „Third Bridge“. „Влијанието врз побарувачката е извонредно и брзо“, додаде тој.
Побарувачката за фосилни горива во следните години може да остане послаба дури и по пандемијата, бидејќи земјите настојуваат да ги ограничат емисиите на штетни климатски промени. Големите нафтени компании како „BP“ и „Total“ објавија предвидувања кои вклучуваат сценарија во кои глобалната побарувачка на нафта може да достигне врв во 2019 година.
Светското производство на нафта и течни горива се намали во 2020 година на 94,25 милиони барели дневно од 100,61 милиони барели во 2019 година, а производството се очекува да се опорави едвај на 97,42 милиони барели следната година, според Администрацијата за енергетски информации (EIA).
„Секој циклус се чувствува како најлошото што некогаш сте го доживеале, но тоа беше невидено“, рече Џон Роби, извршен директор на производителот на нафта „Teal Natural Resources LLC“ со седиште во Тексас.
Со ширењето на случаи со коронавирус, владите воведуваат блокади, држејќи ги граѓаните во затворени простории и подалеку од патиштата. Потрошувачката на сурови и течни горива падна на 92,4 милиони барели дневно за годината, што е пад од 9% од 101,2 милиони барели на ден во 2019 година, соопшти EIA.
Променливиот пејсаж претставува закана за рафинериите. Капацитетот на обработка на пазарот е намален за околу 1,5 милиони барели, велат од „Morgan Stanley“.
Капацитет за дестилација на глобален план се очекува да продолжи да се зголемува, според GlobalData, но намалената побарувачка и слабите маржи на бензин, дизел и други горива ги принудија рафинериите во Азија и Северна Америка да го затворат или ограничат производството.
Падот во поразвиените економии „ги става рафинериите на високо конкурентен пазар за извоз на производи“, рече „BP“ во септемвриска прогноза.
Следните неколку месеци веројатно ќе бидат нестабилни бидејќи инвеститорите проценуваат ослабена побарувачка против уште еден потенцијален скок во снабдувањето со нафта од производителите, вклучувајќи ја Организацијата на земјите извознички на нафта (ОПЕК) и нејзините сојузници.
„Пазарите беа турбулентни и хаотични во изминатите 12 месеци со трајни последици, при што пазарот започна да формира нови контури на нормалност и пост-вирусна рамнотежа“, велат аналитичарите од „Mitsubishi UFJ Financial Group“.