73-годишен маж од Северна Македонија, на кого му се слошило вчера по вакцинирањето, е во кома, потврдува директорот на Универзитетскиот клинички центар, Зоран Перишиќ, кој вели дека засега исклучиле кардиолошка причина, и ќе направат друга дијагностика, пренесе порталот „Јужне вести“.
Милорад Јеркан, директорот на Здравствениот дом, изјави дека на маж од земјава му се слошило вчера во салата „Чаир“. Неговите први проценки биле дека не е нешто сериозно. Сепак, од моментот на прием, како што изјави директорот на УЦЦ Перишиќ, постариот човек не е во свесна состојба. Според информациите од докторот, тој се уште е во кома.
„Не сме го виделе во поинаква состојба во просториите на Клиничкиот центар во кое било време. Ништо не се менува, нема значителни промени во споредба со вчерашниот ден“, вели Перишиќ.
Тој додава дека не е позната причината поради која пациентот е во кома по вакцинирањето.
„Имајќи предвид дека пациентот имал операција со 4 бајпаси, направена е коронарна ангиографија и се снимени бајпасите, нема знаци на срцев удар, ништо не се случило околу срцето, го исклучивме тоа“, посочува Перишиќ.
Тој додаде дека во зависност од состојбата на 73-годишникот, ќе се обидат да направат и друга дијагностика.