Претпладнево започна увидот за причините за пожарот предизвикан во ТЦ Глобал во Струмица.
При увидот, во Трговскиот центар денес влегоа инспектори од Дирекцијата за заштита и спасување, како и јавен обвинител од ОЈО, со цел да ги истражат причините.
Инаку, во пожарот, што избувна во саботата навечер во 23:12 часот, опожарена е една третина од Градскиот пазар, повеќе продавници на приземјето и првиот кат, како и дел од вториот.
Пожарот во „Глобал“ бил пријавен од стражарската служба. Тој избувнал во делот каде се врши доставување на стока и брзо се проширил.
Премиерот Зоран Заев, кој заедно со градоначалникот на Струмица, Коста Јаневски, вчера беше на увид по големиот пожар, најави организирање масовна солидарна акција за расчистување и за возобновување на „Глобал“, како и акција за финансиска помош.