Вишото државно обвинителство во Подгорица издаде наредба за спроведување истрага со предлог за притвор и предлог за издавање на потерница против македонскиот државјанин Андреј Танасковски (18), поради основано сомнение дека пред помалку од еден месец се обидел да го убие Марко Љубиша Кан од Будва.
Како што прецизираше Обвинителството, се сомнева дека А.Т. го извршил кривичното дело обид за убиство на 7 август на базенот на хотелот „Маестрал“ во Будва, испукувајќи неколку проектили во правец на Кан, од кои се здобил со тешки телесни повреди.
– Наредбата е доставена за понатамошно одлучување до Вишиот суд во Подгорица, до истражниот судија – додадоа оттаму.
На 15 август, полицијата објави дека го решила обидот за убиство на Марко Љубиша Кан (56) од Будва на 7 август во хотелскиот комплекс „Маестрал“ во Будва. Тие го идентификуваа директниот сторител како државјанин на Северна Македонија, Андреј Танасковски (18).