Пет месеци по невидената трагедија во Белград, Обвинителството поднесе обвинение против родителите на малолетниот ученик осомничен за убиството на деветте соученици и училишниот чувар во центарот на српската престолнина, а се теретат и уште две лица одговорни од Стрелачкиот клуб Партизан.
Обвинителството бара казна од 12 години затвор за таткото на момчето кое според полициската истрага на 3 мај уби девет ученици и училишен чувар во основното училиште „Владислав Рибникар“, соопштија претставници на обвинителството на 10 октомври.
Момчето тогаш ранило уште неколку соученици, како и наставничката по историја.
Обвинителството бара и 2,5 години затвор за мајката на момчето.
Обвинението од 276 страници е поднесено и против претседателот на Стрелачкиот клуб Партизан Ратка I и инструкторот во овој клуб Немања М.
За што се обвинети таткото и мајката на момчето?
Главното обвинение против Владимир К., таткото на момчето, е дека го обучувал синот како да ракува со оружје, како и дека не го чувал оружјето согласно прописите, на безбедно место и без можност некој друг да дојде до истото.
Обвинителството оправдано се сомнева дека Владимир К., една година пред убиството, го обучувал својот 13-годишен син да ракува со оружје, да пука во цели во форма на силуети на луѓе, цела рамка, како да стои и како да дише при употреба на огнено оружје, изјави високиот јавен обвинител Ненад Стефановиќ на прес-конференција што директно ја пренесуваа одредени телевизии.
Владимир К., кој со месеци е во притвор, на рочиштето во текот на истрагата „негираше дека го извршил кривичното дело“, соопшти претходно обвинителството.
По сослушувањето на таткото во обвинителството, Ирина Боровиќ, законскиот застапник на семејството на осомничениот, рече дека оружјето било „заклучено и под шифри и дополнително обезбедено во однос на она што го пропишува законот“.
За недозволено носење и поседување оружје е поднесена кривична пријава за мајката на момчето, Миљана К., а обвинителот рече дека на една од чаурите била пронајдена нејзината ДНК.
За давање лажна изјава се товарат претседателот на Стрелачкиот клуб Партизан, Ратко И., и инструкторот Немања М., кои претходно изјавија дека не го виделе момчето како вежба на стрелиште.
Обвинителството за нив бара тригодишна затворска казна.
Момчето е „криминално неодговорно“, бидејќи не наполнило 14 години, колку што е старосната граница за поднесување кривична одговорност, соопшти претходно Вишото јавно обвинителство на денот кога се случи убиството.
Тој веднаш по трагедијата е уапсен и оттогаш е под стручен надзор.
Според обвинението, таткото на момчето чувал оружје и муниција во два пластични куфера кои служат за транспорт, а кои биле чувани во ранец, објасни обвинителот.