По три месеци на врвот, Peugeot 208 повеќе не е најпродаваниот автомобил во Европа, а тронот во јули го презеде германскиот кросовер Volkswagen T-Roc.
Резултатите од продажбата во јули покажаа дека францускиот хечбек повеќе не е најпродаваниот автомобил на Стариот континент и сега е на третото место.
Со продадени 19.130 примероци, Volkswagen T-Roc е најпродаван автомобил во јули на европскиот пазар, што е зголемување од 15 отсто во споредба со истиот период минатата година. На второ место е Dacia Sandero со 17.228 продадени примероци, што е пад од 16 отсто во однос на јули 2021 година.
Peugeot 208 можеби повеќе не е најпродаваниот автомобил, но со испорачани 16.423 примероци, забележа пораст од 47 отсто во споредба со истиот месец минатата година. Volkswagen T-Roc е петтиот автомобил оваа година кој беше најпродаван автомобил за еден месец. Победници на пазарот оваа година беа Dacia Sandero (јануари), Volkswagen Golf (февруари), Tesla Model 3 (март) и Peugeot 208 (април, мај и јуни).
Ако ги погледнете резултатите од продажбата за првите седум месеци од 2022 година, Peugeot 208 е на прво место. Гледајќи само во јули, T-Roc и 208 се два од петте модели кои забележаа рекорден раст на продажбата. Голем успех забележаа Dacia Duster, Opel Corsa и Kia Sportage. Помеѓу 50-те најпродавани автомобили, раст на продажбата забележаа и Citroen C3, Fiat 500, Škoda Kodiaq и Hyundai i20.