Американскиот државен секретар Мајк Помпео изрази длабока загриженост за турските активности на истокот на Медитеранот, на кои се спротивставуваат Грција, Кипар и Европската унија.
„Остануваме длабоко загрижени за турските операции за барање природни ресурси во областите на источен Медитеран за кои Грција и Кипар тврдат дека им припаѓаат“, рече Помпео по состанокот во Никозија со кипарскиот претседател Никос Анастасијадис.
Помпео дојде на Кипар од Доха, каде во саботата започнаа разговорите меѓу авганистанската влада и талибанските бунтовници за мировен договор.
Шефот на американската дипломатија остана на Кипар само неколку часа, пренесува Блумберг.
Грција и Кипар ја обвинуваат Турција за потрага по наоѓалишта на нафта и гас во нивните води, додека Анкара вели дека има еднакви права на изворите во тие води.
Грција и Турција тврдат дека имаат право да ги искористат енергетските ресурси во спорната област. Турција испрати истражувачки бродови, а членките на ЕУ испратија бродови за поддршка на Грција.
Анкара и Атина изведуваат воени вежби со фрегати и авиони.