Обилните врнежи од дожд кои во последните денови го зафатија источниот регион утрово предизвикаа поплавување на простории и дворови во повеќе објекти на различни локации во Општина Чешиново-Облешево, вклучително и во селата Чешиново, Облешево и Чифлик.
Според информациите добиени од Градоначалникот на општината, локалната самоуправа со сите расположливи ресурси е активно ангажирана на терен. Во интервенциите учествуваат и ТППЕ Кочани, Водостопанство „Брегалница“ и РЦУК Кочани. Побарана е и дополнителна материјално-техничка поддршка, особено за испумпување вода од поплавените објекти.
Поради обилните врнежи, реките Брегалница и Кочанска река се со значително зголемен водостој, а на одредени локации во општините Штип и Чешиново-Облешево е забележано нивно излевање од коритата.
Како последица на врнежите, утрово се појавија свлечишта на експресниот пат Радовиш–Штип и на патниот правец Злетово – брана Кнежево. За настаните од страна на ЦУК веднаш беше информирано ЈП Македонија пат, чии екипи излегоа на терен и интервенираа соодветно.
Лизгање на земјште во с.Липково место викано Кисела Вода. За настанатата состојба од Општина Липково сме известени дека Општина Липково располага со ограничени ресурси за интервенции од ваков тип, како и поради сериозноста и ризикот од понатамошно влошување на состојбата, побарано е во санирањето на свлечиштето да се вклучат и државните институции.