Поранешниот министер за надворешни работи на Косово, Петрит Селими смета дека приказните на претседателката на Косово, Вјоса Османи за инцидентот на скопскиот аеродром не придонесуваат ниту за неа, ниту за Косово.
Тој на платформата „Х“ објавил дека Османи не се огласувала за далеку поважни прашања, како што се заканите од тамошната влас за слободата на говорот.
„Претседателката Османи треба да престане секој втор ден да ја разгорува оваа приказна за нејзините зафрканции на скопскиот аеродром. Тоа не е во ред. Тоа не ѝ помага ниту на неа ниту на Косово. Никогаш не кажала ниту збор за многу поважни прашања – од заканите на власта за слободата на говорот до колапсот на нашата дипломатија“, напишал Селими.
President Osmani should stop reigniting this story of her kerfuffle in Skopje airport every second day. It’s not becoming. Nor helping her or Kosovo. She never says a word on a far more important issues – from gov’s threats to freedom of speech to the implosion of our diplomacy pic.twitter.com/y5Ib6SYSwS
— Petrit Selimi (@Petrit) August 9, 2024
Претседателството на Косово реагираше откако македонската Агенција за цивилно воздухопловство утврди дека вработените на аеродромот во Скопје постапиле кон косовската претседателка врз основа на меѓународните стандарди и процедури и порачаа дека Османи повеќе нема да патува преку нашиот аеродром.
Агенцијата за цивилно воздухопловство заклучи дека аеродромот не ги прекршил правилата за време на, како што соопшти Османи, дипломатскиот скандал. Во извештајот се посочува дека претседателката на Косово одбила да биде проведена во уште два случаи на скопскиот аеродром.