Филип Бридлав, поранешен врховен командант на трупите на НАТО во Европа, смета дека постојат три сценарија како ќе се одвива конфликтот меѓу Украина и Русија. Два од трите можни исходи подразбираат руска победа.
„Ние на Украина ѝ даваме доволно средства за да остане на бојното поле, наместо да ѝ дадеме доволно за навистина да победиме. Ако Западот продолжи со таква политика, Украина ќе ја загуби војната. Русија едноставно има повеќе луѓе и ресурси. Ако, пак, едноставно ја напуштиме Украина, тие ќе продолжат храбро да се борат. Ќе умрат уште десет илјади Украинци, а рускиот претседател Владимир Путин ќе ја освои целата земја, која повторно ќе биде под нивна власт“, изјавил тој за Newsweek.
Како командант на НАТО помеѓу 2013 и 2016 година, Бридлав сведочеше за последиците од анексијата на Путин на Крим во 2014 година.
„Стравот навлезе во коските на западните лидери, а таквите исплашени луѓе не се во состојба да донесат одлуки кои би го поразиле Путин“, додаде Бридлав.
Во Американскиот институт за војна (ISW), влијателен „тинк-тенк“ со седиште во Вашингтон, веруваат дека замрзнувањето на конфликтот е многу полоша опција отколку да се продолжи да ѝ се помага на Украина, „бидејќи тоа ќе му даде доволно време на Владимир Путин да се подготви за обновување на воените битки и можен конфликт со НАТО“.
„Длабоко сум загрижен, ова ќе биде многу тешка година за Украина. Не го зголемивме нашето производство на оружје до степен до кој можеме да ѝ обезбедиме на Украина огнена супериорност во војната“, рече Густав Гресел, виш политички соработник во Европскиот совет за надворешни работи. Тој се надева дека 2025 година ќе биде подобра за Украина доколку се подобрат синџирите за снабдување со оружје и обуката на украинските војници.
САД испратија повеќе од 79 милијарди долари во Украина од почетокот на руската инвазија, што е најмногу во светот. Од тоа околу 30 милијарди се употребени за вооружување.
Освен од САД, на Украина ѝ треба многу помош и од Европската Унија. Унгарскиот премиер Виктор Орбан, кој минатиот месец стави вето на испраќањето пакет од 50 милијарди долари од Брисел во Киев, првенствено се спротивставува на нивните планови. Без тој пакет, рече украинскиот претседател Володимир Зеленски, Украина нема да ја преживее третата година од војната.
Во САД, голем дел од републиканците, предводени од поранешниот претседател Доналд Трамп, инсистираат на прекин на помошта за Украина.
„Западната поддршка за Украина треба да се пренасочи кон изградба на одбранбени сили во земјата, потоа кон нивна обука, како и производство на оружје во таа земја“, изјавил за Newsweek Виктор Коваленко, воен аналитичар и поранешен украински војник.