Израелскиот премиер Бенјамин Нетанјаху можеби се подготвува за „долга и тешка војна“, но поранешниот премиер Ехуд Барак стравува дека на Израел му преостануваат само уште неколку недели да го елиминира Хамас бидејќи јавното мислење, пред се американското, брзо се свртува против неговите акции во Газа.
Во ексклузивно интервју за „Политико“, поранешниот премиер од 1999 до 2001 година и лидер на израелските одбранбени сили (ИДФ) од 2007 до 2013 година, исто така, посочи дека мултинационалните арапски сили би можеле да ја преземат контролата врз Газа по воената кампања, за да помогнат во враќање на палестинската управа на Махмуд Абас преземајќи ја власта што ја држи Хамас од 2006 година. Сепак, дури и со оваа промена во политичкиот поредок во Газа, Барак нагласи дека враќањето на дипломатијата насочена кон создавање палестинска држава е многу далечна перспектива.
„Арапските лидери мора да бидат способни да му кажат на својот народ дека нешто се менува и дека се отвора ново поглавје, во кое има искрени напори од сите страни да го смират конфликтот. Но, тие треба да слушнат дека Израел е способен да размислува во смисла на промена на насоката, како во последните години“, рече Барак и продолжи:
„Ова не значи дека Израел треба или може да брза да ги оживее преговорите за решение со две држави, предупреди тој. Враќањето во деновите кога преговарав со Јасер Арафат можеби нема да биде можно долго време. Историјата не се повторува. Така што не мислам дека такво нешто може да се повтори. Но, како што велеше Марк Твен, историјата може да се римува. Ќе биде потребно време. Довербата од сите страни исчезна, а недовербата само се продлабочи“.
Сепак, нешто ќе мора да се случи многу брзо во напорите на Израел, бидејќи, истакна тој, реториката на американските претставници се промени во последните денови и повиците за прекин на огнот, како и предупредувањата за хуманитарна криза во Газа, стануваат се почести.
„Америка не може да му диктира на Израел што да прави. Но, не можеме да ја игнорираме. Ќе треба да се помириме со американските барања во следните две или три недели, веројатно помалку“, рече тој, мислејќи на улогата на Вашингтон како главен гарант за безбедноста на Израел.
Барак додаде дека ќе бидат потребни месеци или дури години за да се искорени Хамас, што е главната воена цел поставена од израелскиот премиер Нетанјаху и неговиот воен кабинет.
„Западната поддршка слабее поради бројот на цивилни жртви во Газа и стравот дека израелскиот одговор ќе предизвика многу поширока и уште покатастрофална војна во регионот. Западните нации се исто така загрижени за своите граѓани меѓу 242 заложници кои Хамас ги држи во Газа“, истакнува тој и додава:
„Го губиме јавното мислење во Европа и за недела или две ќе почнеме да губиме влади во Европа. И наскоро тензиите со Американците ќе излезат на површина“.
Само минатата недела американскиот претседател Џо Бајден ја нагласи потребата од „хуманитарна пауза“, што е сосема спротивно на реториката по 7 октомври, кога не беше доведен во прашање израелскиот одговор на терористичкиот напад.