Според податоците на „Our world in data“, 84% од населението во Португалија е целосно вакцинирано, што е највисок процент од вакцинираните во која било земја во светот. Ова значи дека Португалија брзо се приближува кон својата цел – целосно да вакцинира 85% од својата популација во рок од девет месеци. Веројатно се потребни само неколку дена за да се постигне таа цел.
Клаудија Бојгус (53) вели дека била зачудена од начинот на организирање на вакцинацијата во Португалија и фактот дека е постигнат најголем процент на вакцинација во светот.
„Никогаш не мислев дека ќе достигнеме 85 проценти, но сега заслужуваме честитки“, рече таа.
Голем дел од заслугите за овој резултат му припаѓа на вицеадмиралот Енрике Едуардо Гувеља е Мело, кој со својот тим вооружени сили ја презеде имплементацијата на вакцинацијата во февруари. Военото учество во спроведувањето на вакцинацијата против коронавирус не е невообичаено, но Португалија одигра водечка улога во ова.
Се покажало дека е добар избор. Иако тимот на адмиралот работел рака под рака со здравствените власти, полицијата и градските власти, воената експертиза се покажала како непроценлива.
Во интервју за АП, вицеадмиралот признал дека замената на политичкиот тим што поднесе оставка по три месеци била „страшна“. Во тоа време, Португалија беше во најлошата фаза на пандемијата, кога беше меѓу најтешко погодените земји. Болниците беа пред колапс, а испораките на вакцини не пристигнаа, пренесува „Њузвик“.
Foto: Rita Franca/NurPhoto / Shutterstock Editorial / Profimedia
Тој бил командант на подморницата и во еден момент бил задолжен за два брода во исто време. Тој, исто така, бил капетан на фрегатата, ја предводел Еуромарфор, поморските сили на ЕУ и забележал најмногу часови на море од сите официјални офицери на Португалската морнарица.
Тој успеал да ги отстрани грешките од почетната стратегија, како оние што вакцинацијата се спроведува само во мали центри за јавно здравје. Португалија започна да користи големи спортски објекти низ целата земја – за да воспостави она што адмиралот го нарече „производствена линија“ – област за прием и обработка, чекална, област за вакцинација и област за опоравување.
Тој ангажирал војници во воената болница во Лисабон за да го одреди најбрзиот проток на луѓе низ зградата.
Следеше голема промена кога пристигна голема понуда на вакцини кон средината на јуни, што овозможи поголем број луѓе да се вакцинираат. Вицеадмиралот успеал да ја „намали целата политика“ и да ја обезбеди довербата на јавноста во воведувањето на вакцинацијата.
„Ја добивме битката. Не знам дали ја добивме војната против вирусот. Ова е светска војна“, изјавил тој.
Foto: Global Media Group / ddp USA / Profimedia
Португалија ги укина ограничувањата
Денес, Португалија е во толку добра позиција да укине голем број преостанати ограничувања поврзани со пандемијата. Оваа одлука беше донесена само неколку дена откако Данска ги укина сите домашни ограничувања поради високата стапка на вакцинација.
Владата соопшти дека ќе ги укине сите ограничувања за бројот на луѓе во кафулиња и ресторани, на свадби и крштевски, во трговски центри, на концерти и во кина од 1 октомври. Баровите и дискотеките ќе бидат повторно отворени, иако само за вакцинирани лица и лица со негативни тестови за коронавирус.
Премиерот Антонио Коста истакна дека некои ограничувања мора да останат на сила. Носењето маска ќе продолжи да се практикува во јавниот превоз, во болниците и домовите за стари лица, како и во трговските центри. Луѓето кои доаѓаат од странство сепак ќе треба да покажат сертификат за вакцинација или негативен тест на вирусот.