Норвешката полиција повторно го уапси Мариус Борг Хојби, најстариот син на принцезата Мете-Марит, како осомничен за напад, закани со нож и прекршување на забраната за приближување, соопштија надлежните институции. Апсењето се случува еден ден пред почетокот на судењето против него по повеќе кривични обвиненија.
Полицијата информира дека побарала да му биде одреден притвор во траење од четири недели, поради ризик од повторување на кривично дело. Хојби, син на принцезата Мете-Марит од претходна врска и посинок на престолонаследникот Хокон, беше на слобода до синоќа, иако обвинението против него е поднесено уште во август минатата година.
Судењето треба да започне утре во Осло, а обвинителниот акт содржи вкупно 38 точки, меѓу кои тешки кривични дела поврзани со сексуално и физичко насилство, закани, како и други прекршоци. Хојби ги негира обвиненијата за сексуално насилство и поголемиот дел од обвинувањата за насилство.
Случајот предизвика големо внимание во норвешката јавност, особено поради фактот што Хојби нема кралска титула ниту официјални должности, но е директно поврзан со кралското семејство. Престолонаследникот Хокон неодамна изјави дека тој и принцезата Мете-Марит нема да присуствуваат на судењето и дека кралската куќа нема да дава коментари додека постапката е во тек.
Дополнителен притисок врз имиџот на норвешкото кралско семејство предизвикаа и објавените документи поврзани со американскиот финансиер Џефри Епстин, во кои се споменуваат контакти на принцезата Мете-Марит со него. Кралската куќа потврди дека таа во минатото престојувала во негова сопственост на Флорида, а самата Мете-Марит јавно изрази жалење поради контактите и солидарност со жртвите на Епстин.
Проблемите поврзани со судењето на Хојби, како и другите контроверзии поврзани со членовите на кралското семејство, последните години предизвикуваат засилени критики во норвешката јавност, иако монархијата и натаму ужива висока поддршка меѓу граѓаните.