Oгнената стихија не стивнува. Десетици пожари на отворено и натаму активни во земјава. Утрово активни се 13 пожари на отворено од вчерашните 24, информира Центарот за управување со кризи.
Од рано утрово противпожарно се дејствува по земја и со воздухопловна поддршка од сите летала кои се на располагање, и домашни и од другите земји кои испратија Гори главно непристапен терен. Борбата на противпожарните екипи продолжува, во гаснењето вклучени и хеликоптери и Ер-трактори. Се уште активен пожарот на планината Серта, гори од неколку страни.
-Огнот се приближува кон селото Калањево, но нема опасност по селото, истакнуваат од ЦУК.
Кај Калањево горат нискостеблеста шума и грмушки, а, како што информира градоначалникот на Росоман, Стојан Николов, од вчерашната локација кај Сирково, огнот се префрлил во близина на селото Мрзен.
Во Неготино заседаваше Кризниот штаб. Оттаму бараат поинтензивна поддршка од воздух за гаснење на пожарот на Серта. И во Штип се состана Кризниот штаб. Таму се мобилизираат луѓе и механизација за гаснење на пожарот кои се приближува кон селото Пиперово.
Жител на Росоман се здобил со изгореници при гаснење пожар, а пожарникари беа заробени од огнот на планината Огражден, но беа евакуирани со хеликоптер. Директорот на ЦУК, Стојанче Ангелов побара централизиран систем за управување со пожарите.