Турскиот претседател Реџеп Тајип Ердоган му предложи на рускиот колега Владимир Путин трилатерална средба со сирискиот претседател Башар ал Асад, пренесува ТАСС.
„Претседателот Путин позитивно гледа на мојот предлог. Ќе започнеме серија преговори“, изјави Ердоган пред новинарите.
Според турската телевизија Хабертурк, Ердоган предложил создавање механизам за подобрување на односите меѓу Анкара и Дамаск.
„Прво би можеле да се сретнат нашите разузнавачки служби, потоа министрите за одбрана, по нив шефовите на дипломатиите на сите три земји, по што ние како лидери би можеле да се сретнеме“, рече Ердоган.
Претходно оваа недела, Ердоган разговараше со Путин за проширување на договорот за извоз на жито преку Црното Море, а Турција, заедно со ОН, посредуваше во преговорите меѓу Русија и Украина претходно оваа година.