Според резултатите од анкетата на „Фокс њуз“, поранешниот потпретседател на САД, Џо Бајден ужива доверба од 48% од оние што ќе гласаат на претседателските избори во ноември во САД, додека досегашниот претседател Доналд Трамп е поддржан од 40% од испитаниците.
Во исто време, според просечните резултати на сите анкети кои барем делумно ја опфаќаат оваа недела, демократот Бајден, доколку се одржат изборите сега, би добил 48 проценти од гласовите, додека републиканецот Трамп би добил 41 процент.
Некои би рекле дека пред последните претседателски избори, тогашниот демократски кандидат Хилари Клинтон го имаше водството и дека на крајот таа сепак изгуби, но оваа недела предноста на Бајден над Трамп јасно ја надмина онаа на Клинтон во истиот период пред четири години, посочува Си-Ен-Ен.
Според анкетите во тоа време, од првата половина на април 2016 година, кога во просек изнесуваше 10 проценти, предноста на Клинтон падна на само еден процент помеѓу 16 и 23 мај 2016 година, според Си-Ен-Ен.
Исто така, кога станува збор за сигурни индивидуални анкети, во истиот период во 2016 година, Клинтон беше три проценти зад Трамп, додека, четири години подоцна, во анкетата организирана од истата медиумска куќа, Бајден има предност од осум проценти.
Клинтон во тоа време заостануваше зад Трамп, според резултатите од многу сигурна телефонска анкета, додека, заради споредба, Бајден не заостануваше на ваквата анкета спроведена оваа година.
Згора на тоа, Бајден го има најстабилното водство кое еден предизвикувач во трката за претседателското место го имал од најмалку 1944 година – тој од почетокот на годината стабилно стои околу шест проценти во просек, а поддршката на Клинтон од 48 проценти никогаш не беше достигната, туку во голема мерка зависеше од гласовите на гласачите кои донеле одлука за тоа кога да гласаат во последен момент.
Интересно е што за разлика од тоа, Трамп сега ужива скоро ист процент на поддршка како на крајот на мај 2016 година, односно само околу 0,4 проценти помалку отколку во истиот период пред четири години.
Покрај тоа, пред четири години, во некои од анкетите се појавуваше и трет кандидат за претседател, а процентот на неопределени гласачи беше поголем отколку денес, а според Си-Ен-Ен, тие беа факторот што му помогна на Трамп да ја оствари изборната победа.
Прашањето што очигледно се поставува е дали Бајден може да ја задржи предноста, но јасно е дека неговата изборна кампања, која ја води од телевизиско студио во подрумот на неговата куќа, дава резултати, заклучува Си-Ен-Ен.