Копретседателот на здружението на Бугари „Шемето“ од Струга, Бекир Кадриески, кој беше претепан пред два дена, сака да замине за Бугарија и таму да го продолжи лекувањето, бидејќи како што вели, се сомнева дека ќе добие соодветна помош во Македонија.
Тој во емисија на државната „БНР“ соопштил дека денеска се чувствува подобро, но истакнал дека во болницата не му се направени никакви испитувања, туку само му биле препишани лекови. Според него, лекарите не биле особено засегнати од неговите повици за помош.
„Ми рекоа: кога ќе ти дојде редот, можеш да се снимаш“, вели Кадриески, кој се пожалил на стомачни болки и главоболки.
Посочил дека го видел својот напаѓач, но немал блиски односи со него, но дека напаѓачот сам ѝ се предал на полицијата.
Кадриески нема бугарски пасош, ниту државјанство, но потенцира дека има бугарска самосвест и идентитет.
Другиот копретседател на „Шемето“, Живко Чакракчиев обвинил дека македонските власти сакаат да ги прикријат работите и случајот да го третираат како обичен, а не како злосторство од омраза, изјавил тој за „БНТ“.
Македонското МВР вчера соопшти дека случајот е расчистен, а од МНР побараа да не се шпекулира со квалификации околу причините за инцидентот.
Претходно бугарското МНР соопшти дека нивен претставник бил испратен во Струга за да се утврди дали нападот е резултат на кривично дело од омраза.