Руските власти му вратиле 10 милијарди рубљи (111,2 милиони долари) на прогонетиот водач на „Вагнер“, Евгениј Пригожин, кои ги заплениле во полициските рации за време на неговиот бунт минатиот месец, пишува The Moscow Times, цитирајќи ја веб-страницата „Фонтанка“.
Полицијата во Санкт Петербург заплени голема сума пари – заедно со „стотици илјади“ американски долари и пет златни полуги – во рациите на имотите поврзани со Пригожин на 24 јуни.
Претресите беа извршени како дел од истрагата за бунтот против водачот на „Вагнер“, обвиненијата кои претседателот Владимир Путин на крајот се согласи да ги отфрли во замена за Евгениј Пригожин да се откаже од бунтот и да замине во соседна Белорусија.
Според „Фонтанка“, полицијата му ги вратила парите и златото, проценети на „неколку тони“, на возачот на Пригожин, додека самиот Пригожин, наводно, присуствувал на затворен состанок во неделата во Санкт Петербург.
Додека „Вагнер“ маршираше кон Москва на 24 јуни, Пригожин призна дека запленетите пари биле наменети за исплата на плати на неговите борци и материјална отштета за семејствата на загинатите платеници.
Првичните извештаи велат дека полицијата во Санкт Петербург запленила четири милијарди рубљи (47 милиони долари) од паркирано комбе. „Фонтанка“ подоцна напиша дека уште шест милијарди рубљи (66,7 милиони долари) биле запленети во 80 картонски кутии од друго комбе.
Руските медиуми јавуваат дека двете комбиња се видени на нивните првични паркинг места од понеделникот вечерта.
Истата страница известува и дека на Пригожин му бил вратен пиштолот Глок што го добил како награда од министерот за одбрана Сергеј Шојгу, како дел од враќањето на арсеналот оружје пронајден при претресот на неговата куќа за време на бунтот.
Како што наведува сајтот, ноќта помеѓу 4 и 5 јули, BMW серија 7 и придружниот „Land Cruiser“ со обезбедување се упатиле до зградата на Управата на ФСБ на Санкт Петербург и Ленинградската област. Тие биле паркирани во близина на улицата Шпалернаја 25. Задната врата на BMW -то се отворила, Евгениј Пригожин излегол и, одејќи само неколку метри, сам ја отворил огромната врата.
Неколку часа претходно, првиот човек на „Вагнер“ беше официјално повикан да го врати оружјето запленето на 24 јуни за време на претресот на неговата селска резиденција во елитното летувалиште „Северен Версај“ (област Лахта-Олгино, област Приморски во Санкт Петербург).
„Фонтанка“ објави дека во неделата, на 2 јули, на Пригожин веќе му биле вратени 10 милијарди рубли. Парите се пронајдени во дворот на хотелот „Трецини палас“ и во комбе на подземниот паркинг на хотелот „Ривер хаус“ (двата хотела се на островот Василијевски). Возачот на Пригожин ги примил парите по полномоштво.
Според руските медиуми, на Пригожин на 4 јули му биле вратени две карабини „саига“, австриска карабина „Штеир манлихер“, полуавтоматска пушка „Арка“ и уште неколку пушки и пиштоли.
Најпрестижниот предмет во оваа колекција е пиштолот „Глок“, кој на лидерот на „Вагнер“ му го додели Сергеј Шојгу, пред да дојде до недоразбирање меѓу најпознатиот бизнисмен во Русија и министерот за одбрана за војната во Украина.
Официјалната процедура во Литеина не траела долго. Набргу Евгениј Пригожин заминал, а луѓето што го следеле ги извадиле пушките и ги ставиле во автомобилот, а потоа си заминале.