Привремениот претседател и премиерот на Мали беа ослободени, откри воен претставник во четвртокот, три дена откако двајца политичари беа приведени и лишени од овластувањата во вториот државен удар во девет месеци.
„Привремениот претседател и премиерот беа ослободени во текот на ноќта, околу 1:30 часот (по локално време). Стоевме зад своите зборови“, рече воен претставник за „Франс Прес“, зборувајќи под услов да остане анонимен.
Членовите на семејството потврдија дека претседателот Бах Ндав и премиерот Моктар Оуан се ослободени.
Двајцата лидери беа ослободени еден ден откако војската објави дека претседателот и премиерот „поднеле оставка“ во притворот, што Обединетите нации го нарекоа „неприфатливо“.
Војската ги приведе во понеделникот, а меѓународната заедница го прогласи тој потег за нов државен удар.
ООН, Африканската унија, други меѓународни тела и САД во последните денови ја повикаа војската на Мали да ги ослободи двајцата лидери.