Продажбата на „Тесла“ во Европа нагло падна во април, откако американскиот производител на електрични автомобили продолжува да трпи штета на својот имиџ во регионот и се соочува со растечка конкуренција.
„Тесла“ продаде 7.261 возила во Европа во април, што е пад од 49% во споредба со истиот месец минатата година, според податоците на Европската асоцијација на производители на автомобили (ACEA). Тој пад се случи и покрај тоа што вкупната продажба на електрични возила на батерии порасна за 34,1% на годишно ниво.
Во последните месеци, „Тесла“ претрпе штета на брендот поради политичкиот ангажман на извршниот директор Илон Маск со американскиот претседател Доналд Трамп, а во март избувнаа протести пред салоните на „Тесла“ низ цела Европа.
Продажбата на „Тесла“ падна за речиси 40% помеѓу јануари и април на годишно ниво.
Компанијата годинава претстави надградена верзија на својот SUV модел Y, но нејзината целокупна понуда на возила останува застарена, без досега објавени нови модели за масовен пазар.
Во исто време, „Тесла“ се соочува со растечка конкуренција и од традиционалните производители на автомобили и од агресивните кинески конкуренти. Минатата недела, одделни податоци покажаа дека кинескиот автомобилски гигант BYD за прв пат продал повеќе електрични возила во Европа од Тесла.
Европските потрошувачи, исто така, сè повеќе претпочитаат хибридни електрични возила – автомобили со помала батерија кои сè уште користат претежно традиционални горива. Хибридите моментално сочинуваат нешто повеќе од 35% од вкупниот автомобилски пазар во Европа, според податоците на ACEA.
Тесла не нуди хибридни модели, туку продава само целосно електрични возила.
Инвеститорите ја доведуваат во прашање посветеноста на Маск на „Тесла“ поради неговата вмешаност како советник на Доналд Трамп и неговата улога како раководител на таканаречениот „Оддел за владина ефикасност“. Маск на последната квартална презентација на приходите од работењето на „Тесла“ изјави дека значително ќе го намали времето што го поминува во управувањето со тоа тело до крајот на мај, но дека планира да посвети „еден или два дена неделно“ на работа во државната служба.
Технолошкиот милијардер во неодамнешниот јавен говор додаде дека е посветен на водење на „Тесла“ во следните пет години.