Вишиот суд во Белград на 60 дена му го продолжи притворот на Владимир К, таткото на момчето кое на 3 мај уби девет врсници и чуварот на училиштето во ОУ „Владислав Рибникар“.
На Владимир К. му е продолжен притворот за да не го повтори делото, како и со оглед дека е обвинет за сторено кривично дело за кое е пропишана затворска казна над 10 години, како и начинот на извршување и сериозноста на последиците од кривичното дело доведе до реакција во јавноста, што може да го загрози непреченото и правичното водење на кривичната постапка, се вели во соопштението на тој суд.
На мајката на момчето, Миљана К., претходно и е изречена забрана за приближување, средба или комуникација со одредено лице, мерка со која и се забранува приближување, средба или комуникација со нејзиниот син К.К., сведок во оваа постапка.
Во обвинението за тешко кривично дело против општата безбедност се товари Владимир К., а за кривично дело недозволено изработување, држење, носење и тргување со оружје и распрскувачки материи, Миљана К.
Почетокот на судењето во оваа постапка е закажан за јануари.