Во Комисијата за финансирање и буџет, продолжува расправата за конечните извештаи на Овластениот државен ревизор за 2021-ва, во Клиниката за онкологија. На претходните две седници, членовите имаа можност да поставуваат прашања до главниот државен ревизор Ацевски и до државниот јавен обвинител Јовески. Со ревизијата е утврдено дека има проблем во начинот на кој се водело издавањето на терапијата, лицата кои се ставаат на терапија, набавката и евиденцијата.
Утре пак продолжува со работа и Анкетна комисија за скандалот во Онкологија. На распит се очекува да се појават поранешниот и актуелниот министер за здравство, Венко Филипче и Фатмир Меџити. Претходно беа сослушани ексминистерот за здравство Сали и министерот за внатрешни работи Спасовски. За вечер пред Владата повторно е најавен протест. Се бара брза разрешница на случајот.
Државниот јавен обвинител Љубомир Јовески пред неколку дена соопшти дека е можно во некоја од соседните земји да има вештачење за случајот „Онкологија“. Тој потврди дека соработката со Косово и Албанија е се уште во рамки на размена на информации, но што ќе покаже таа соработка, засега е отворено прашање.
Според Јовески, неблагодарно е да се прогнозира кога ќе има конкретен обвинителен акт. Многу поважно е, нагласи, да се дојде до вистината, односно до релевантни податоци – кој што направил во конретното дело.
Министерот за внатрешни работи Оливер Спасовски на втората седница на Анкетната комисија информира дека се водат финансиски истраги за околу седум лица од Клиниката.