Најмалку три лица загинаа како последица на поплавите по уривањето на браната Каховка во јужна Украина, јавија украинските медиуми, цитирајќи го Јевхен Рјушчук, протераниот градоначалник на градот Олешки во Херсонската област, кој е под руска окупација. „Киев Индипендент“ објави дека жртвите се удавиле. Исто така, пробивањето на браната ќе има катастрофално влијание врз лоцирањето на мините, предупреди меѓународниот комитет на Црвениот крст.
Ерик Толефсен, шеф на единицата за контаминација на оружје, предупреди дека исфрлените мини во поплавата предизвикале голема загриженост не само за жителите на Херсон, туку и за оние кои доаѓаат да помогнат.
„Знаевме каде се опасностите. Сега не знаеме. Знаеме само дека се некаде низводно“, рече тој.
Наталија Хумениук, претставник на јужната воена команда на Украина, за украинската телевизија изјави дека „многу мини (во областите окупирани од Русите) сега станаа пловечки мини“.
„Тие се многу опасни“, рече таа, објаснувајќи дека најверојатно ќе експлодираат доколку се судрат или удрат во нешто.
„Конфликтните страни не го објавија бројот на мини што ги поставија. Само знаеме дека бројката е огромна“, предупреди Толефсен.
Илјадници луѓе веќе се евакуирани од делови на Херсонската област, бидејќи водата продолжува да тече по реката Дњепар, која ги дели териториите контролирани од Русија и Украина.
Москва и Киев меѓусебно се обвинуваат за уривање на браната Каховка која го снабдувала со вода Крим, која Русија ја анектираше во 2014 година, а која се наоѓа во област што украинските сили сакаат да ја ослободат.
Уривањето на браната предизвика издигнување на Дњепар и принуди илјадници жители да ја напуштат подводната област поради стравувањата од еколошка катастрофа.
Браната пукна рано во вторникот, испуштајќи порои вода кои поплавија големи делови од јужниот дел на украинскиот регион Херсон.