Српскиот претседател Александар Вучиќ и претседателот на Република Српска, Милорад Додик, ќе присуствуваат на прославата по повод 80-годишнината од победата над фашизмот, што ќе се одржи на 9 мај во Москва. Русија објави список на политичари од 19 земји кои ќе присуствуваат на церемонијата по повод Денот на победата во Москва. Покрај српскиот претседател Вучиќ и претседателот на Република Српска, Додик, на прославата ќе присуствуваат и кинескиот претседател Си Џинпинг, словачкиот премиер Роберт Фицо, бразилскиот претседател Луиз Инасио Лула да Силва, претседателот на Буркина Фасо Ибрахим Траоре, венецуелскиот лидер Николас Мадуро, виетнамскиот лидер То Лам и кубанскиот претседател Мигел Дијаз-Канел.
Во Москва ќе бидат и белорускиот претседател Александар Лукашенко, казахстанскиот претседател Касим-Жомарт Токаев, киргистанскиот претседател Садир Жапаров, ерменскиот премиер Никол Пашинјан, Бадра Гунба — претседател на отцепената грузиска територија Абхазија, која е поддржана од Русија — и азербејџанскиот претседател Илхам Алиев. Се очекува да присуствуваат и претседателот на Палестина Махмуд Абас, претседателот на Таџикистан Емомали Рахмон, претседателот на Туркменистан Сердар Бердимухамедов и претседателот на Узбекистан Шавкат Мирзијоев.
Поканата од Москва сè уште не е потврдена од индискиот премиер Нарендра Моди и монголскиот претседател Ухнаагийн Хурелсух. Да потсетиме дека рускиот претседател Владимир Путин прогласи тридневен прекин на огнот во Украина токму за да се одбележи Денот на победата над фашизмот и го повика Киев да го стори истото. Кремљ објави дека прекинот на огнот ќе биде на сила од 8 до 11 мај. Во овој период, сите непријателства ќе бидат суспендирани.
Во историјата на СССР, а подоцна и на Русија, се одржале вкупно 34 Паради на победата, пишува руската агенција RCB. Четири од нив се случиле за време на советскиот период: во 1945, 1965, 1985 и 1990 година. Практиката на редовно одржување на парадата започна по распадот на СССР, во 1995 година. Тогаш, во чест на 50-годишнината од Победата, маршот од 1945 година беше повторно изведен на Црвениот плоштад, а десет дена подоцна Русија го усвои федералниот закон „За овековечување на победата на Советскиот народ во Големата татковинска војна од 1941 до 1945 година“. Со тоа, 9 мај беше прогласен за национален празник и неработен ден, кој се одбележува со воена парада и артилериски оган.