Претседателот Владимир Путин во петокот рече дека речиси целосното губење на довербата на Русија во Западот ќе го отежне постигнувањето конечно решение за Украина, иако контактите меѓу руските и американските разузнавачки служби барем продолжуваат.
Откако претрпе серија пресврти на бојното поле, Путин сè повеќе ја толкува својата повеќе од деветмесечна инвазија на Украина како борба за одбрана на Русија од агресивниот „колективен Запад“.
На прес-конференција во главниот град на Киргистан, Бишкек, Путин изрази жалење поради неуспехот да се имплементираат договорите од Минск – договорот за прекин на огнот од 2014-2015 година и уставните реформи меѓу Киев и сепаратистичките сили поддржани од Русија во источна Украина со посредство на Русија, Франција и Германија, во пресрет на почетокот на конфликтот со Украина.
– Мислевме дека сепак ќе успееме да се договориме во рамките на мировните договори од Минск. Што може да се каже? Тоа е прашање на доверба. А довербата, се разбира, е речиси на нула – рече рускиот лидер.
Путин беше прашан за изјавите на поранешната германска канцеларка Ангела Меркел, еден од спонзорите на договорот, која за весникот „Цајт“ во интервју објавено во средата изјави дека договорот од 2014 година е „обид да се купи време на Украина“ – што таа го искористи за да стане поспособна да се брани.
Руските медиуми и политичари брзо го протолкуваа ова како предавство на Меркел.
– Се испостави дека никој нема да ги исполни сите овие договори од Минск, а поентата беше само да се наполни Украина со оружје и да се подготви за воени дејствија – рече Путин.
– По ваквата изјава се поставува прашањето како да се преговара, за што и дали е можно да се преговара со некого, и каде се гаранциите – додаде тој.
– На крајот ќе треба да се постигне договор. Многупати сум кажал дека сме подготвени за овие преговори, отворени сме, но ова не принудува да размислиме со кого си имаме работа – рече тој.
И портпаролот на Кремљ, Дмитриј Песков, и рускиот заменик-министер за одбрана Сергеј Рјабков веќе нагласија во петокот дека ослободувањето на американската кошаркарска ѕвезда Бритни Гринер од руската казнена колонија во четвртокот во замена за рускиот дилер со оружје Виктор Бут не претставува пошироко одмрзнување на лошите билатерални односи.
Путин, сепак, рече дека Русија е отворена за понатамошни такви размени и дека продолжуваат контактите меѓу соодветните разузнавачки служби кои се согласија за договорот Гринер-Бут.
– Всушност, тие никогаш не престанаа. Најден е компромис, не одбиваме да продолжиме со оваа работа во иднина – рече тој.