Рускиот претседател Владимир Путин им рече на лидерите на еврејската заедница во Русија дека Москва „постигнала конкретни резултати“ во дипломатските напори за ослободување на заложниците кои ги држела палестинската милитантна група Хамас.
На средбата со главниот рабин на Русија, Берл Лазар и претседателот на Федерацијата на еврејските заедници, Александар Борода, Путин навел дека Русија ги искористила своите контакти со политичкото крило на Хамас, пренесува „Ројтерс“.
„Бидејќи ситуацијата стана понапната на Блискиот Исток, Русија прави се за да им помогне на луѓето кои станаа заложници. Како што е познато, нашето министерство за надворешни работи работеше преку политичкото крило на Хамас и во целина имаше конкретни резултати“, истакна Путин.
Тој додаде дека Москва се обидела да им помогне и на оние кои не се руски државјани.