Во пресрет на средбата со американскиот лидер Џозеф Бајден во Женева, рускиот претседател Владимир Путин даде интервју за американската телевизија „Ен-Би-Си“ при кое оцени дека воените вежби на НАТО и САД се одржуваат во непосредна близина на руските граници ипостави прашање што би се случило ако Русија го стори истото.
„Замислете дека ја праќаме нашата војска директно до вашите граници. Кој би бил вашиот одговор?“, праша Путин.
Американската телевизија исто така потсетува дека, кога Путин беше запрашан за неодамнешниот трансфер на руската армија во близина на украинските граници, што ги загрижи сите за можна инвазија, Путин рече дека Русија спроведува воени вежби исклучиво на своја територија. Рускиот претседател го наведе фактот дека НАТО рутински спроведува воени вежби во близина на руските граници, како и фактот дека Америка спроведува маневри на Алјаска, која е исто така близу границите на Русија.
Сите обвинувања се фарса
Тој исто така ги отфрли сите обвинувања во врска со вмешаноста на Русија во изборниот процес, додека рече дека обвиненијата дека Русија или руски хакери се одговорни за сајбер напади во Америка се „фарса“.
„Тие нè обвинија за многу работи. За мешање во избори, за сајбер напади и така натаму. Ниту еднаш, но ниту еднаш не се потрудија да дадат докази. Ова се само неосновани обвинувања“, рече Путин.
Сепак, на прашање од домаќинот дали е загрижен дека американската разузнавачка служба можеби веќе навлезе длабоко во руските мрежи и дека е способна да нанесе посериозна штета, Путин рече дека, иако е можно, таквата опција не го плаши.
Од друга страна, Путин изјави дека Русија е загрижена за сајбер активностите на НАТО.
„Она од што се плашат во Америка може да биде опасност и за нас. НАТО го прогласи сајбер-просторот за борбена зона. Тие планираат нешто, подготвуваат нешто, секако дека сме загрижени за тоа“, рече Путин.
Сепак, тој исто така изрази надеж дека Русија и Америка ќе започнат процес на соработка кога станува збор за борба против компјутерскиот криминал.
„Ајде да седнеме заедно, да разговараме, да најдеме компромисни решенија што ќе бидат прифатливи за обете страни“, рече тој.
Путин се осврна и на прашањето на рускиот блогер Алексеј Навални, велејќи дека е третиран не полошо од другите затвореници.
На прашањето дали тој лично го нарачал убиството на Навални, Путин рече дека Русија „нема навика да убива некого“.
Можна размена на затвореници
За време на интервју за „Ен-Би-Си“, Путин исто така рече дека прашањето за размена на затвореници може да се дискутира за време на претстојниот самит со американскиот државен врв.
Имено, на прашањето дали е подготвен да го разгледа прашањето за размена на затвореници, тој одговори: „Да, се разбира“.
„Знам дека во Русија има неколку американски државјани кои се осудени и кои се во затвор. Сепак, има неспоредливо повеќе руски граѓани кои се наоѓаат во американските затвори. Тие бројки се едноставно неспоредливи “, додаде тој.