Шпанскиот фудбалер Рафа Мир, кој беше уапсен пред десет дена под обвинение за сексуален напад и силување, се обидел да стапи во контакт со една од жртвите во обид да ја убеди неа или нејзината пријателка да не покренуваат обвиненија или последователно да ги повлечат, објави локалниот весник „Лас провинцијас“.
Двете жртви пријавиле и последователно дале изјави во локалната полиција, покажувајќи ги нивните дневници за повици, како и разговорите на WhatsApp во кои тој се обидел да контактира со нив. Фудбалерот на Валенсија истакна дека е јавна личност и дека сето тоа може сериозно да се одрази на неговата кариера, индиректно навестувајќи ги парите со кои располага како можност да ги компензира дејствијата.
Утрото на 2 септември, две девојки поднеле пријава во полиција, сведочејќи дека биле жртви на силување и сексуален напад во куќата на Рафа Мир од него и неговиот пријател, кој исто така е фудбалер. Тој потоа беше приведен, а по две ноќи поминати зад решетки пуштен со кауција. Една недела подоцна тој излезе со официјално соопштение во кое повторно се изјасни дека е невин, што очекува да се докаже на суд.
Сепак, новите факти фрлаат сомнеж врз ова тврдење. Валенсија исто така објави соопштение во кое осудува секаков облик на сексуално насилство, но не со конкретни одлуки за казнување на Рафа Мир.