Процесот на воведување на земјите од Западен Балкан во Европската унија можеби е полн со тешкотии, но тоа е единствениот начин да се оди напред, рече албанскиот премиер Еди Рама на конференција во Атина.
„Да се биде дел од Европската унија е нашиот единствен избор, не само затоа што тоа го бараат други, помоќни пријатели, туку затоа што тоа е барање на нашите деца“, рече Рама на 24-та тркалезна маса на британскиот неделник „Економист“ со грчката влада, пренесе грчкиот весник „Катимерини“.
Напорите кон мир и меѓусебно разбирање меѓу земјите од Западен Балкан даваат резултати, рече албанскиот премиер, додавајќи дека и покрај разликите, како што е одбивањето на Србија да го признае Косово, тие земји сепак можат да разговараат и да ги решаваат споровите преку дијалог.
„Сè уште можеме да седнеме на иста маса, да разговараме, да гледаме во иднината и заедно да се подготвуваме“, рече Рама, чија земја претседава со ОБСЕ оваа година.