Во Нова Градишка вчера беше откриен споменикот на легендарниот Тоше Проески, кој трагично го загуби животот на 16 октомври 2007 година. Проески загина во сообраќајна несреќа на автопатот кај Нова Градишка, а споменикот го изработи скулпторот Славко Буниќ.
По веста за откривањето, социјалните мрежи беа преплавени со реакции, а многумина се согласуваат дека статуата воопшто не наликува на пејачот.
„Не сум видел ништо пострашно. Дали се натпреварувате да направите „подобар“ цртан филм? Зарем ни малку не го цените овој прекрасен човек? Што е ова? Фарса? Не ви е срам? Отстранете го затоа што сите ви се смеат… Да се уништи ликот на Тодор Проески на таков начин е толку болно што ми е тешко да ги најдам вистинските зборови за да го опишам овој срам“, се само дел од коментарите на бесните фанови.
„Жално е што не можеше да биде малку подобро. Да не пишува Тоше, никогаш немаше да погодиме кој е“, напиша друг корисник на социјалните мрежи. „Ако ова е Тоше Проески, јас сум Лепа Брена“, е друга реакција. „На прв поглед ми личи на Томо Здравковиќ, а и на втор, барем во однос на држењето на микрофонот“, напишаа шокираните фанови.
Да потсетиме, Тоше беше познат по своите настапи, но и по скромноста, хуманоста и несебичноста. Имаше бројни хитови како „Игра без граници“, „Ледена“, „Среќна ли си ти?“, „Боже, брани ја од зло“, а соработуваше и со многу колеги од естрадата.
Фото: Pixsell