Комисијата за жалби на својот состанок во средата го потврди жолтиот картон што го доби Лука Модриќ при гостувањето на Реал Мадрид во Селта. Ова е натпревар од 28.коло на шпанското фудбалско првенство, во кое Реал Мадрид победи со 3:1, а Модриќ доби јавно предупредување во 80. минута од натпреварот.
Модриќ веднаш гестикулираше дека не му е јасно зошто бил предупреден откако Ренато Тапија падна над него, додека тој ја додаваше топката на левата страна од теренот. Неговиот жолт картон го изненади и клубот, кој реши да се жали на судиската пресуда, тврдејќи дека Тапија всушност го удрил Модриќ, додека тој му ја испраќал топката на Лукас Васкез.
Жалбата е одбиена и Модриќ засега останува со жолт картон.
Реал Мадрид претходно изјави дека ќе инсистира на бришење на предупредувањето на Модриќ. Клубот има 15 работни дена да се обиде да го стори тоа во повисоките инстанци.