Управата на Реал Мадрид продолжува да биде активна на трансфер пазарот во обид да го засили тимот пред почетокот на Светското клупско првенство ова лето. Тие веќе ги доведоа Трент Александар-Арнолд (Ливерпул) и Дин Хујзен (Борнмут) на „Сантијаго Бернабеу“, а се очекува наскоро да им се придружи и дефанзивецот на Бенфика, Алваро Карерас, но тоа не е сè. Четвртото засилување се подготвува од Германија во лицето на Ангело Стилер (Штутгарт).
Новиот тренер на Реал, Чаби Алонсо, сака по секоја цена да го засили средниот ред со играч со силни дефанзивни карактеристики, но во исто време и прогресивен поглед на играта при изнесување на топката. Неговиот прв избор беше Мартин Зубименди, но веќе се смета дека играчот од средниот ред на Реал Сосиедад дефинитивно е новото засилување за Арсенал, поради што подготви план Б во Стилер.
Алонсо има одличен увид во квалитетите и можностите на играчите, со оглед на тоа што помина две години во Бундеслигата како тренер на Баер Леверкузен. 24-годишниот играч од средниот ред се смета за исклучително талентиран, а многу експерти во неговата игра гледаат дел од талентот што го поседуваше Тони Крос.
Стилер постигна четири гола и имаше 11 асистенции во 47 натпревари за Штутгарт минатата сезона, вклучувајќи осум настапи во Лигата на шампионите.
Реал ќе има тешка задача да се справи со заминувањето на легенда како Лука Модриќ, па затоа идејата е да се врати Нико Паз од Комо во средниот ред, како и да му се даде поголема улога на Арда Ѓулер, кој минатата сезона наговести дека би можел да преземе посериозна улога во тимот.