Раководството на Реал Мадрид сериозно ја разгледува можноста да му понуди нов договор на ветеранот Марсело. Актуелниот договор на Бразилецот истекува на лето и се очекуваше тој да го напушти „Сантијаго Бернабеу“. Во последните денови, сепак, дојде до пресврт и не се мали шансите тој повторно да потпише за уште една сезона, тврди „Мундо Депортиво“.
Пред неколку дена, 33-годишниот лев бек стана играчот со најмногу трофеи во историјата на Реал Мадрид. Тој веќе има 24 пехари на своето конто – еден повеќе од Пако Хенто. Ова стана факт откако „Белиот балет“ и официјално ја обезбеди титулата во Ла Лига по победата над Еспањол од 4-0.
Марсело ретко играше оваа сезона, а тренерот Карло Анчелоти се обложуваше главно на Ферлан Менди како лев бек. Бразилецот има запишано само 5 натпревари во Ла Лига. Така, се шпекулираше дека од „Сантијаго Бернабеу“ веќе бараат помлада замена, а една опција е клубот да го врати Серхио Региљон од Тотенхем.
Сепак, самиот Марсело инсистираше на шефовите на клубот дека нема желба да си замине и сака да продолжи да го носи белиот дрес. Затоа мадриѓани сериозно ја разгледуваат можноста да му понудат нов едногодишен договор. Конечната одлука ќе биде донесена по завршувањето на сезоната.
Речиси целата досегашна кариера на Марсело ја помина на „Сантијаго Бернабеу“. Во клубот беше доведен од Флуминенсе во 2007 година и досега има 545 натпревари, 38 гола и 103 асистенции.