Трансферот на Касемиро од Реал Мадрид во Манчестер Јунајтед изгледа се поверојатен. Според гласините во Шпанија, 30-годишниот Бразилец веќе ги известил своите најблиски соиграчи дека најверојатно ќе ја прифати понудата на „црвените ѓаволи“. Веќе вчера шпанските медиуми објавија дека „белите“ нема да му застанат на патот на играчот од средниот ред и ќе остават да донесе одлука дали ќе си замине.
Од „Сантијаго Бернабеу“ сметаат дека Касемиро ќе ја прифати понудата на Јунајтед поради новиот предизвик и фактот што англискиот клуб му понуди двојно поголема плата од моменталната во Реал, како и договор за пет години.
Зделката најверојатно ќе вреди околу 60 милиони фунти.
Поради сето ова, Реал веќе почна да разговара за опциите за замена на Касемиро. Според „АС“, фаворит број 1 во овој поглед е играчот од средниот ред на Њукасл, Бруно Гимараеш. 24-годишниот Бразилец, кој има и шпанско државјанство, има неоспорен талент и би бил долгорочно решение за средниот ред на „белите“.
Проблемот од гледна точка на Реал е што преговорите со Њукасл ќе бидат доста тешки. Бразилецот е една од големите ѕвезди на „страчките“, а новите сопственици сигурно немаат финансиски проблеми и тешко дека можат да бидат во искушение.
Според „АС“, Њукасл ќе одреди цена за Гимараеш која е двојно поголема од онаа што ја платија за него во јануари. Тогаш англискиот клуб му плати на Лион околу 52 милиони евра.