Уште еден црн (или поточно црвен) ден во светот на криптовалутите, овој пат без премногу истакнати причини. Неколку економски показатели се поклопија така што упатуваа на можен негативен развој на состојбите, па на пазарите каде оптимизмот е прилично нестабилен почна голема распродажба.
Биткоинот беше особено нестабилен во текот на изминатиот ден, па за само 12 часа прво забележа скок на вредноста од околу 4%, по што следеше пад од речиси 10%. На крајот, вкупниот пад за 24 часа беше над 8% за цената на биткоинот, додека целиот глобален пазар на криптовалути „потона“ за 7,5% – преку ноќ, значи, изгуби во вредност од речиси 150 милијарди долари.
Во моментов, глобалниот крипто-пазар, според CoinMarketCap, вреди 1,816 трилиони долари. На својот врв, на почетокот на ноември минатата година, таа вредност беше 3 трилиони долари.
Ако го гледаме само биткоинот како најголема криптовалута, неговата вредност, исто така, го достигна врвот во ноември, кога достигна 69.000 долари. До вчера изнесуваше околу 43 илјади, а во текот на минатата ноќ падна на нешто повеќе од 38 илјади долари – односно на ниво на кое не бил од август 2021 година.
Ниту алткоините не поминаа подобро: етерот изгуби 12% во вредноста, а меѓу најголемите губитници беше доџкоинот со пад на цената од над 20%.
Хакиран Crypto.com
Освен економските показатели и загриженоста на инвеститорите за неизвесниот тек на пандемијата, на негативното расположение на тргувањето веројатно влијаеше и веста за хакирањето на платформата Crypto.com. Неделава хакирани се 483 сметки на клиенти, од кои напаѓачите се обиделе да украдат вкупно 34 милиони долари. Сингапурската компанија тврди дека го запрела нападот, односно дека никој од нивните клиенти не останал без својот влог.
Русија предлага забрана
Речиси во исто време, Русија објави дека тамошната централна банка ќе и предложи на владата целосна забрана за користење и ископување криптовалути низ целата земја. Како причини тие ги наведуваат заканите за финансиската стабилност, благосостојбата на граѓаните и монетарниот суверенитет на Руската Федерација.
Централната банка на Руската Федерација верува дека поголемиот дел од побарувачката за криптовалути е шпекулативна по природа и дека пазарот има својства на пирамидална шема. Нивната забрана би го опфатила не само тргувањето и плаќањето на криптовалути, туку и работењето на менувачниците и ископувањето криптовалути, што посочуваат дека создава проблеми во снабдувањето со електрична енергија.
„Најдоброто решение за сите овие проблеми е целосна забрана“, велат тие.