Од тимот на Ред Бул најавија дека ќе ја анализираат големата максимална брзина која болидот на Мерцедес ја покажа за време на викендот за Големата награда на Сао Паоло, особено онаа на Луис Хамилтон.
Британецот го искористи својот петти мотор во Бразил и покажа исклучителна брзина на долгите линии на „Интерлагос“. Таа му дозволи да напредува за вкупно 25 позиции во саботниот спринт и неделната трка по различните казни што ги доби.
Според Ред Бул, сосема е можно задното крило на Мерцедес да се „витка“ повеќе од дозволеното при одредена брзина, откако Макс Верстапен го проверувал токму тоа по завршувањето на квалификациите во петокот. Сепак, тој беше казнет со 50.000 евра за неговите постапки, а Ред Бул избра да не протестира против легалноста на W12 во оваа фаза.
„Не протестиравме по оваа трка. Важно е да се разбере од каде доаѓа оваа брзина. Да, тука имаа нов мотор. Тие користеа крила како за Монако, но беа за околу 30 km/h побрзи од Макс кога го претекнаа. Ова е нешто што треба да се објасни. Работа на ФИА е да го следи почитувањето на правилата на спортот. Ние веруваме во нив, во нивните тестови и истраги“, изјави шефот на „биковите“, Кристијан Хорнер.
Ако Мерцедес всушност користи флексибилно задно крило, тоа ќе биде навистина иронично во позадина на драмата со овој елемент од почетокот на сезоната. Во Шпанија составот на светските шампиони се пожали дека задното крило на Ред Бул премногу се „витка“ на правците, што им дава предност. Потоа, ФИА воведе нови, построги тестови од Француското ГП и се чинеше дека проблемот со флексибилните крила е заборавен.
Сепак, се чини дека тоа не е така, а драмите во спорот за титулите на и надвор од патеката нема да завршат пред крајот на сезоната, а можеби и после.
„Немаше шанси да се натпреваруваме со Мерцедес. Се трудевме да се заштитиме што повеќе. Макс даде се од себе, се натпреваруваше силно, но немаше шанси. Ги имавме височините на САД и Мексико и сега оваа загуба. Беше тешко бидејќи водевме во 75% од трката. Добрата работа е што следната трка е оваа недела и ќе можеме брзо да одговориме на овој предизвик“, додаде Хорнер.
По Големата награда на Сао Паоло, водството на Верстапен во битката за титулата беше намалено на 14 поени на три кола пред крајот на сезоната, а пасивата на Ред Бул кон Мерцедес во борбата за шампионската титула кај конструкторите се зголеми на 11 поени.
Сезоната 2021 продолжува оваа недела со првата трка за Големата награда на Катар, која ќе се одржи под вештачко осветлување на мотоциклистичката патека „Лусаил“.