Коалицијата „Европски фронт“, предводена од ДУИ, денеска ги обвини македонските политички чинители, пред се двете најголеми партии ВМРО-ДПМНЕ и СДСМ, дека вршат притисок врз членовите на Државната изборна комисија, за да се поништи гласањето на дел од избирачките места, по поднесените приговори за парламентарните избори на 8-ми. Велат дека притисокот е многу голем, но ќе ги преземат сите средства за да оневозможат да им се одземат пратеници. Тврдат дека станува збор за изборен инженеринг, а дека легитимитетот е кај нив.
-Жалиме што ВЛЕН е дел од таквата коалиција. Причината е дека македонските политичари не можат да се согласат дека „Европскиот фронт“ е втора политичка сила во земјава, добиена од гласовите од сите општини со албанско мнозинство. Ќе ги преземеме сите демократски средства за да се оневозможи ваква злоупотреба, рече Скендер Реџепи-Зејд во изјава за медиумите.
Според него, денес реалноста се пресликува во друга димензија во споредба со случувањата во 2016 година.
-Не се работи само за еден или двајца пратеници. Сакаат „Европскиот фронт“ да не биде втора политичка сила, повтори пратеникот.
Реџепи-Зејд додаде дека тие како коалиција немаат поднесено приговори до ДИК.
Во Комисијата денеска се разгледуваат приговорите од парламентарните избори. Има 27 пристигнати.