Новак Ѓоковиќ го воодушеви светот кога по финалето на Ролан Гарос со Циципас му даде рекет на момче од првиот ред. Два дена по епското финале во пет сета, се појавија првите проценки.
Кен Голдин, извршен директор на „Goldin Auctions“, проценува дека рекетот веќе вреди меѓу 25.000 и 35.000 долари.
Езра Левин, директор на платформата „Collectible“, која се занимава со спортска опрема, смета дека рекетот е уште поскап и може да достигне до 50.000 долари.
Да потсетиме, со овој рекет Ѓоковиќ го сврте резултатот од 0:2 на 3:2 во финалето против Стефанос Циципас, кога го освои својот 19 Гренд слем и втор трофеј на Ролан Гарос.
Со овој рекет им се приближи на Рафаел Надал и Роџер Федерер, па неговата вредност, и симболично и материјално, може само да расте.
Голдин го додава тоа, тврдејќи дека рекетот ќе вреди најмалку 50.000 долари ако Новак освои 20 или повеќе Гренд слем титули, и дека ќе се искачи до 100.000 долари, доколку ги земе годинашните титули на Вимблдон и УС Опен.
Секако, со оглед на тоа како момчето реагираше кога го доби подарокот, овие проценки веројатно нема да имаат смисла бидејќи рекетот веројатно ќе заземе посебно место во домот на среќното дете уште долго време.