Противниците на електричните автомобили секогаш го споменуваат опсегот како еден од најголемите проблеми на овие возила, но Renault Zoe опремен со специјални гуми успеа да мине 765 километри, а со тоа покажа дека дури и малите градски автомобили, напојувани од електрична енергија, можат да поминат значителна оддалеченост.
Mission Motorsport е тим на воени ветерани кои организираат настани поврзани со автомобилската индустрија за да обезбедат средства за помош на погодените од воените операции. Овој пат на патеката Трукстон во Велика Британија се обидоа да го соборат рекордот во опсег за мали електрични автомобили со моделот Renault Zoe E-Tech.
Претходниот рекорд од 565 километри беше поставен во Франција во текот на 2018 година. Кога ќе ги погледнете официјалните спецификации за моделот Renault Zoe E-Tech, а особено дострелот според WLTP стандардот од 394 километри, соборувањето на овој рекорд изгледаше како невозможна мисија .
Сепак, комбинацијата на идеални временски услови, конфигурацијата на патеката и возењето со просечна брзина од 30 км / ч постави нов рекорд, дури и со стандардни гуми.
Во првиот обид, Renault Zoe E-Tech помина 683 километри и со тоа го сруши рекордот стар три години. Но, тимот на воени ветерани не запре тука.
Во исто време, друга Zoe учествуваше на настанот, која беше опремена со ENSO гуми кои беа специјално дизајнирани да обезбедат поголем опсег за електрични возила. Со овие гуми, само неколку часа подоцна, беше поставен нов рекорд од 765 километри, за кој беа потребни дури 25 часа возење.