Бока Јуниорс има навистина слаба сезона, па претседателот Хуан Рамон Рикелме го повика својот поранешен соиграч од Аргентина, Фернандо Гаго да спаси што може да се спаси.
Поранешниот тренер на Чивас и екс играч на Реал Мадрид се врати во својот матичен клуб откако го напушти мексиканскиот клуб. Беше претставен на „La Bombonera“, каде што треба да остане до декември 2025 година, кога ќе истече претседателскиот мандат на Рикелме.
По 17 кола Бока е на 10. позиција со 24 бодови, 12 помалку од водечкиот Велез. Диего Мартинез доби отказ по поразот од Белграно, трет по ред во шампионатот. Бока во меѓувреме се врати на победите против Аргентинос Јуниорс, а на Гаго ќе биде да ги задржи на тој начин.
„Денес станав тренер на клубот во кој пораснав. Ќе направам се што е во моја моќ да формирам тим кој ќе се натпреварува во сите натпреварувања во кои настапува. Знам дека постапив правилно, имав клаузула што ми ја побара Чивас, а јас ја искористив. Се враќам дома и многу сум среќен и возбуден поради тоа“, изјави Гаго објаснувајќи како се разделил со мексиканскиот клуб.