Националната валута на Русија зајакна денеска на Московската берза на околу 63 рубљи за долар, за првпат достигнувајќи го нивото на почетокот на февруари 2020 година, додека во однос на еврото достигна нов петгодишен максимум.
Во тргувањето до 7:23 часот по средноевропско време, рубљата се стабилизира на 63,32 рубљи за долар, откако претходно го достигна нивото од 62,6250, најсилно претставување од 5 февруари 2020 година. Банките, сепак, нудат многу послаб курс за купување рубљи, пренесе Ројтерс.
На почетокот на денешната седница руската валута скокна во однос на еврото на 64,9425 рубљи, што е нејзин најсилен курс од средината на 2017 година, но подоцна во текот на тргувањето падна за 0,8 отсто на 65,80 рубљи за евро.
Според агенцијата Блумберг, оваа година рубљата стана најуспешната валута во светот, поддржана од контролата на капиталот што Русија ја воведе на крајот на февруари со цел да го заштити финансискиот сектор и да го спречи одливот на девизи поради западните санкции, наметнати поради нападот на Москва врз Украина.
Според њујоршката агенција, рубљата во однос на американскиот долар зајакнала за повеќе од 11 отсто од почетокот на годината. На меѓународниот девизен пазар курсот на рубљата порасна уште повеќе, за околу 12 отсто.
Зајакнувањето на рубљата беше поттикнато од одлуката на монетарниот регулатор дека компаниите фокусирани на извоз мора да ги претворат своите девизни приходи во домашна валута, додека побарувачката за девизи беше ограничена бидејќи увозот во Русија опадна поради логистичките нарушувања и острите западни санкции.
Во четвртокот, претседателот Владимир Путин го посочи растот на рубљата како пример за добрите резултати на Русија под санкции.