Привремениот менаџер Руд ван Нистелрој се надева дека ќе продолжи да работи во англискиот фудбалски клуб Манчестер Јунајтед и по назначувањето на нов тренер, пишува агенцијата Ројтерс. Поранешниот клупски напаѓач стартуваше во победата од 5-2 над Лестер Сити вчера во Лига купот.
„Стигнав овде како асистент. Целта ми беше да му помогнам на тимот кој има потреба и се надевам дека така ќе остане. Тука сум да му служам на клубот, да дадам се од себе и тоа никогаш нема да се промени“, изјави поранешниот напаѓач за Јунајтед и репрезентацијата на Холандија.
Ван Нистелрој беше помошник на менаџерот Ерик тен Хаг, кој беше отпуштен во понеделникот по поразот од Вест Хем со 2-1. Дебито на поранешниот напаѓач беше за паметење бидејќи Бруно Фернандеш и Касемиро постигнаа по два гола, вклучувајќи го и ударот од далечина на бразилскиот играч за врска.
„Овие моменти се вистинско уживање, особено кога имате можност да ги споделите со играчите на теренот и со гледачите. Тоа е навистина убаво чувство“, додаде привремениот тренер на Јунајтед.
„Среќен сум за Касемиро. Тој вложува многу на тренинзите, а исто така сака да му помогне на тимот и на клубот. Касемиро е пример за другите. Помина низ тешки времиња по поразот од Ливерпул, но мислам дека не заслужи толку многу критики“.