Повеќе од еден месец по почетокот на руската инвазија на Украина, се повеќе руски државјани се на страната на Украинците и се борат против војската на Путин.
Има најмалку стотици такви борци, без разлика дали се заробени руски војници или политички дисиденти.
Еден од нив е 30-годишниот Јан, ИТ работник, кој деновите ги поминува во извидување и идентификување артилериски цели. Тој е на страната на украинската територијална одбрана од самиот почеток на војната.
Тој за „Тајм“ изјави дека „ниту еден Русин не требало да ја мине границата со оружје во рака“.
„Тука сум да се спротивставам на руската агресија и да ја бранам Украина“, рече тој.
Заедно со украинските војници, се бори и Витја, 25-годишен руски студент по политички науки, кој вели дека исто така им се приклучил на украинските сили за територијална одбрана за да ја продолжи својата борба против руската влада.
„Ја сакам мојата татковина“, вели Витја од Киев, каде што е стациониран, додавајќи дека се надева дека оваа војна ќе го скрши политичкиот режим.
„Би сакал да се вратам дома еден ден“, рече тој, пренесува „Укринформ“.
Руски војници кои повеќе не се тоа
Војната му создаде многу проблеми на Путин, кои се очигледни дури и меѓу неговите војници, особено по масакрот во Буча.
Така, на 5 април тројцата излегоа во своите руски воени униформи и најавија нов баталјон, кој е целосно составен од руски државјани и поранешни затвореници, а кои сега планираат да се борат против Кремљ.
Во своето обраќање тие рекоа дека се морално огорчени поради недостигот на дисциплина и занемарувањето на човечките животи во Москва. Рекоа дека Русија ги измамила да одат во суверена земја и да извршат геноцид и дека по заробеништвото решиле да ја сменат страната.
Украинскиот парламент на 2 април донесе нов закон според кој секој руски војник кој ќе се предаде со воен брод или авион ќе биде награден со милион долари. За заробен тенк ќе им исплати 100.000 долари, а за помала воена опрема 10.000 долари.
Првиот заменик-претседател на украинскиот парламент Олександр Корниенко рече дека наградите ќе ја мотивираат „деморализираната окупаторска армија“.
Законот беше усвоен откако Украина ги повика руските војници да се предадат и да добијат 10.000 долари за возврат, што тие тврдат дека вродило со плод и стотици руски војници ја напуштиле службата.