Русија ги предала телата на уште 1.000 загинати војници на Украина, а Украина вратила 19 тела на Русија, јавија руските медиуми, повикувајќи се на свој, неименуван извор.
На 19 јуни, рускиот претседател Владимир Путин изјави дека Русија ги предала телата на 6.000 свои загинати војници на Украина и е подготвена да предаде уште околу 3.000.
Киев, исто така, соопшти дека Русија ги вратила телата на 1.000 загинати украински војници. Повеќето од нив загинале на фронтовската линија, но некои загинале во заробеништво. Овие размени се еден од ретките резултати од преговорите меѓу двете земји.
„Како резултат на мерките за репатријација, телата на 1.000 мртви беа вратени во Украина од руска страна, за кои тие рекоа дека се украински војници“, соопшти украинскиот Центар за воените заробеници.