Русија ќе ја промени својата доктрина за употреба на нуклеарно оружје поради, како што смета, западната ескалација во војната во Украина, потврди заменик министерот за надворешни работи Сергеј Рјабков за руските медиуми.
Што вели постоечката доктрина?
Постоечката нуклеарна доктрина, утврдена со декрет на претседателот Владимир Путин во 2020 година, вели дека Русија може да користи нуклеарно оружје во случај на нуклеарен напад од непријател или конвенционален напад што го загрозува опстанокот на државата.
Поагресивните меѓу руските воени аналитичари го повикаа Путин да го намали прагот за употреба на нуклеарно оружје за да ги „отрезни“ руските непријатели на Запад. Путин во јуни рече дека нуклеарната доктрина е „жив инструмент“ што може да се промени во зависност од светските настани.
Да потсетиме, Русија во јуни изврши воена вежба на распоредување на тактичко нуклеарно оружје и истрелување, што беше наредено од Путин. Истиот беше извршен долж границата со Украина и вклучуваше пренос на лажни нуклеарни боеви глави до складишта и аеродроми, каде што беа натоварени на бомбардери, соопшти специјалната нуклеарна единица на руската војска.
Најјасна индикација за промени во нуклеарната доктрина досега
Изјавата на Рјабков е најјасен показател досега дека навистина ќе има промени.
„Работата е во напредна фаза и постои јасна намера да се измени доктрината“, рече Рјабков, пренесе државната новинска агенција ТАСС.
Тој додаде дека одлуката е „поврзана со ескалацискиот курс на нашите западни противници“ во врска со војната во Украина, пренесува Ројтерс.
Нуклеарните закани на Путин
Москва го обвинува Западот дека ја користи Украина како застапник за да води војна против неа, со цел да и нанесе „стратешки пораз“ на Русија и да ја разбие. САД и нивните сојузници го негираат ова и велат дека и помагаат на Украина да се одбрани од агресивна, колонизирачка војна.
На првиот ден од руската сеопфатна инвазија на Украина во февруари 2022 година, Путин рече дека секој што ќе се обиде да ја спречи ќе претрпи „последици со кои досега не се соочиле во историјата“.
Оттогаш, тој даде низа изјави дека Западот го смета за нуклеарна закана и најави распоредување на руско тактичко нуклеарно оружје во Белорусија. Тоа не ги спречи САД и нивните сојузници да ја зголемат воената помош за Украина на начини незамисливи кога започна војната, вклучително и испорака на тенкови, ракети со долг дострел и борбени авиони Ф-16.
Украина ја шокираше Русија со инвазијата на Курск
Украина ја шокираше Русија минатиот месец со пробивање на нејзината западна граница со упад во регионот Курск. Русија се уште се обидува да ги одбие украинските елитни бригади, кои, според украинската армија, зазеле повеќе од 1.250 квадратни километри руска територија, повеќе од 100 населени места и заробиле речиси 600 руски војници.
Украинскиот претседател Володимир Зеленски рече дека успехот на операцијата Курск ги исмева „црвените линии“ на Путин. Путин и другите високи руски функционери, да потсетиме, постојано му се закануваа на Западот со жестока одмазда поради испраќањето воена помош за Украина. Тие закани никогаш не беа реализирани без разлика на нивото на помошта испратена во Украина.
Кога ќе пристигне новата доктрина? „Тоа е тешко прашање“
Портпаролот на Кремљ, Дмитриј Песков, во интервјуто објавено во неделата рече дека Западот „претерува“ и дека Русија „ќе направи се за да ги заштити своите интереси“. Но, Рјабков не кажа кога ќе биде завршена ажурираната нуклеарна доктрина. „Крајниот рок за завршување на оваа работа е доста тешко прашање со оглед на тоа што зборуваме за најважните аспекти за обезбедување на нашата национална безбедност“, рече тој.
Русија има повеќе нуклеарно оружје од која било друга земја. Путин во март изјави дека Москва е подготвена за можна нуклеарна војна „од воено-техничка гледна точка“.
Тој, сепак, додаде дека „нема брзање за нуклеарен конфликт“ и дека „Русија никогаш не се соочила со потребата да користи нуклеарно оружје во Украина“.