Русија подели 1,5 милиони пасоши на жителите на регионите во Украина, изјави вчера рускиот премиер Михаил Мишустин.
Таа одлука е начин Москва да ја зајакне својата контрола врз оние области кои се под руска окупација.
Некои од жителите на тие региони изјавиле за АФП дека врз нив биле вршени притисок да земат руски пасош бидејќи тоа станало неопходно за низа административни процедури.
„Од октомври минатата година, речиси 1,5 милиони луѓе од новите региони добија руски пасоши“, рекол Мишустин на состанокот на Владата на Русија.
Тој ги повикал тие луѓе „да ги почувствуваат вистинските промени во градовите и селата“, особено во однос на реконструкцијата, „образовните можности“ и работата.
Во септември 2022 година, Русија објави дека анектирала четири региони на Украина, кои делумно ги окупира по примерот на полуостровот Крим, кој Москва го анектираше во 2014 година.
Со години Русија им дели пасоши на жителите на областите на Украина контролирани од проруските сепаратисти на истокот, како и на Крим. Истото беше и на териториите под контрола на проруските сепаратисти во Грузија и Молдавија.
Украинските власти ја обвинуваат Москва дека ја користи распределбата на пасошите за да ја оправда својата самопрогласена мисија да ги заштити жителите на Украина кои зборуваат руски.
Европската унија објави дека нема да ги признае руските пасоши издадени на окупираните територии на Украина.