Русија се противи на можното распоредување на европски контингент војници во Украина во случај на мир со Москва, изјави рускиот министер за надворешни работи Сергеј Лавров, во време кога Европејците и Американците размислуваат за периодот по завршувањето на конфликтот.
„Сигурно не сме задоволни од предлозите дадени во име на претставниците на тимот на избраниот американски претседател (Доналд Трамп), кои предвидуваат одложување на приемот на Украина во НАТО за 20 години, како и воведување на мировен контингент составен од „британски и европски сили“ во Украина“, рече Лавров во изјава за агенцијата ТАСС, која министерството ја објави денеска.
Во последните неколку недели се шпекулира за можни идни мировни преговори за Украина, по речиси три години конфликт во кој стотици илјади луѓе беа убиени и ранети.
Меѓу идеите што ги разгледуваат европските земји и Вашингтон е и распоредување на европски воен контингент во Украина, по линијата на фронтот што се протега на околу 1.000 километри.
Тој предлог, што го лансираа францускиот и полскиот претседател Емануел Макрон и Доналд Туск во Варшава во средината на декември, може да ги вклучи армиите на земјите-членки на НАТО или оние со нуклеарно оружје како Франција и Велика Британија.
Портпаролот на Кремљ, Дмитриј Песков, на 16 декември изјави дека „очигледно е прерано да се зборува за мировни војници“.
Европејците стравуваат дека САД ќе престанат да и помагаат на Украина, односно ќе извршат притисок да се постигне договор штетен за Киев, по враќањето на Доналд Трамп во Белата куќа на 20 јануари.
Новоизбраниот американски претседател повика на итен прекин на огнот и рече дека може да обезбеди мировен договор во рок од 24 часа, но не даде детали за тој план.
Украинскиот претседател Володимир Зеленски изјави дека сака повеќе испораки на оружје и безбедносни гаранции од неговите западни сојузници, пред какви било преговори со Москва.
Владимир Путин бара повлекување на пристапот на Украина во НАТО, како и Русија да ги задржи украинските територии што ги анектираше.